Wedi ei leoli wrth galon tref farchnad brydferth fechan, mae gan gampws Llambed ddigon o atyniadau o’i amgylch i ennyn eich diddordeb. Y brifysgol hon yw’r hynaf, a safle’r gêm rygbi gyntaf i’w chynnal yng Nghymru; mae gan y campws hanes hir, gyda chefn gwlad syfrdanol o’i gwmpas i’w fforio.  Nawr eich bod wedi symud i mewn, byddwch yn awyddus i ddod i adnabod yr ardal leol. Ystyriwch yr awgrymiadau hyn er mwyn gwneud y gorau o’ch amser yn astudio yn Llambed.

Cymuned

Efallai’r peth mwyaf atyniadol am astudio yn Llanbed yw’r cysylltiad rhwng y campws a’r gymuned leol. Am fod y campws yn cael ei ddefnyddio gan drigolion y dref, mae ganddo naws gyfeillgar a chroesawgar, ac mae llawer o ffyrdd y gallwch ymwneud â’r gymuned yn ystod eich astudiaethau, gan gyfoethogi eich profiadau myfyrwyr.

• Mae gwirfoddoli yn ffordd wych i gwrdd â phobl newydd, datblygu sgiliau, ac wrth gwrs, rhoi yn ôl i’r gymuned leol. Cysylltwch â’r Undeb Myfyrwyr er mwyn darganfod pa gyfleoedd sydd ar gael.
• Eich dewis cyntaf am noswaith allan dda yw’r Old Bar & Xtension. Yn gysylltiedig ag Undeb y Myfyrwyr, ceir digwyddiadau at ddant pawb yno, gan gynnwys twrnameintiau pŵl, digwyddiadau gwisgoedd ffansi a chlybiau nos. Dim yn hoffi mynd allan? Beth am drefnu tîm ar gyfer eu noson gwis wythnosol?
• Mae afon brydferth Dulas yn rhedeg drwy ganol campws Llambed, ac mae’r ddôl sydd nesaf ati yn fan perffaith i gael picnic amser cinio, barbeciw, neu i chwarae pêl droed. Ni all llawer o gampysau prifysgolion ymffrostio yn y ffaith bod ganddynt leoliad mor hardd, ac mae’n gyfle gwych i fod yn rhan gynhenid o’r gymuned leol.

Edrych ble ‘rydych chi

Fel myfyriwr yn Llambed, byddwch mewn lleoliad perffaith i ymweld â rhai o gyrchfannau mwyaf clodfawr Cymru. Argymhellir gan Steve Davies o’r Adran Profiad Myfyrwyr eich bod yn defnyddio bysiau lleol wrth ymweld ag amgylchoedd syfrdanol Llambed os ydych am eu mwynhau i’r eithaf;

• Ar ôl gyrru am ryw 20 munud o’n campws, fe ddewch o hyd i Aberaeron, tref brydferth ar lan y môr. Mae’n ben taith perffaith am ddiwrnod allan, gyda’i machludau haul, digon o fannau i fwyta ac yfed, a  phorthladd lle y caiff dolffiniaid eu gweld yn aml. Mae’n werth ymweld â hi.   
• Am ei bod hi’n dref brifysgol ffyniannus a phoblogaidd, mae’n hawdd cyrraedd Aberystwyth o Lambed gan ddefnyddio cludiant cyhoeddus. Mae Aberystwyth yn dref arfordirol yng nghanol morlin Ceredigion, ac felly, mae’n ben daith poblogaidd gan rai sydd ar eu gwyliau. Mae gan y dref hanes hir ac mae’n llawn siopau annibynnol, caffes a bwytai. Mae hefyd yn gartref i Lyfrgell Genedlaethol Cymru sy’n cynnal digwyddiadau yn rheolaidd, ac mae ganddi lawer o arddangosiadau sefydlog a storïau hanesyddol a chwedlau diddorol o Gymru i’w rhannu. Ni fydd hon yn daith ofer.
• Mae’r Cei Newydd yn dref syfrdanol arall ar lan y môr, taith o ryw hanner awr yn unig mewn car. Mae’r dref yn cynnig golygfeydd panoramig o arfordir Gorllewin Cymru ac mae’n ben taith gwych ar gyfer gweld bywyd gwyllt.

Cynlluniwch eich taith drwy ddefnyddio Traveline Cymru.

Bwyta ac Yfed

Mae Llambed yn lle gwych i fod os ydych yn hoffi bwyd. Am fod y dref yn llawn busnesau bychain annibynnol, ceir ynddi, felly, lawer o fannau hyfryd i fwyta ac yfed, gan gynnwys nifer o gaffes sy’n cynnig bwyd a theisenni cartref a baratoir yn ffres gan rai sy’n gwybod eu crefft. Mae’n enwog am fod yn gartref i Gaffe Conti, cynhyrchwyr hufen iâ Eidalaidd sydd wedi ennill gwobrwyon, ac mae’n gyrchfan perffaith ar gyfer cymryd egwyl rhag astudio ar ddiwrnod heulog.

Yn chwilio am rywle hyfryd i’w fforio dros y pen wythnos? Rhaid ymweld â Marchnad y Bobl a leolir yn Neuadd Fictoria, oherwydd arddangosir yma, rai o’r bwydydd lleol gorau, gwaith crefft a wnaed gan law, a cherddoriaeth fyw. Dewch o hyd i fwy o manylion yma.

Yn ychwanegol i hyn,  mae campws y brifysgol yn cynnal Ffair Fwyd Llambed, bob mis Gorffennaf, sy’n boblogaidd ac sy’n denu cannoedd o bobl sy’n frwdfrydig dros fwyd a diod i’r dref er mwyn siopa am gynnyrch lleol, i gymdeithasu  ac i wylio arddangosiadau byw gan ben gogyddion.

A ydym wedi anghofio dweud rhywbeth? Rhannwch eich hoff safleoedd gyda ni ar gyfryngau cymdeithasol @UWTSDStudents.